ಕವಿತೆ: ಶ್ರಾವಣದ ಸಂಭ್ರಮ

      "ಶ್ರಾವಣದ ಸಂಭ್ರಮ"
 ~~~~~~~~~~~~~~~

'ಶ್ರಾವಣದ ಸಂಭ್ರಮ', ಬಣ್ಣಿಸುವಳು ಇವಳು ಹೇಗೆ!
ತುಸು ನಾಚಿಕೆ, ತುಸು ಮುನಿಸು ಕಾಡಿರಲು ಇವಳ ಹೀಗೆ!

ಎಷ್ಟೋ ದಿನದ ಕನಸು ನನಸಾಗಿರೆ ಸವಿ ಸೊಗಸು
ತೋರಿದೆ ಕೆಂಪೇರಿದ ಸುಮಬಾಲೆಯ ಮೊಗದಲ್ಲಿ!
ಬಯಸಿದ ನಿತ್ಯ ನೋಟ, ಅವತರಿಸಿರೆ ನವ ಮಾಟ!
ನೋಡಿ ನವೀನ ರೂಪ, ಇವಳ್ಹೊಳೆವ ಕಣ್ಗಳಲಿ!

ಎಂದೂ ಕಾಣದ ಮುನಿಸು, ಸಾಕಾಗಿರೆ ಕಿವಿ ಮಾತು!
ಮೂಡಿದೆ ಚಡಪಡಿಕೆ ಪಲ್ಲವಿಸಿದ ಒಲವಲ್ಲಿ
ಬಿಡುವೆ ಕೊಡದ ಕೆಲಸ, ಸಾಕಗಿದೆ ಪ್ರತಿದಿವಸ
ಕಾಡಿದೆ ರಜೆಯ ತಾಪ, ತನ್ನಲ್ಲನ ಕಲೆವಲ್ಲಿ!

ಶ್ರಾವಣ ತೋರಿದಾಗ, ಸಂಗಮಿಸಲು ಶುಭ ಘಳಿಗೆ
ಆಷಾಢದಿ ಅಭಿಸಾರಿಕೆ, ನಿತ್ಯಂತರ ಸುಳಿಯಲ್ಲಿ!
ರಾಯರ ಮಾತೆ ಮುತ್ತು, ಅವರದೇನೆ ಮೂರು ಹೊತ್ತು!
ಮಿಲನಕೆ ಸಜ್ಜಾದರು, ಗತ್ಯಂತರ ಇರದಲ್ಲಿ!

ರಚನೆ - 'ಸಂತ' (ಸ.ಗು.ಸಂತೋಷ್)
ತಾರೀಖು - ೧೩/೦೭/೧೦

ಪ್ರೇರಣೆ - ನನ್ನ ಶ್ರೀಮತಿ, ಇತ್ತೀಚೆಗಷ್ಟೆ ಮದುವೆಯ ಸಂಭ್ರಮದೆಡೆಗೆ ಪಯಣ ಆರಂಭಿಸಿದ ನನ್ನ ತಮ್ಮನ ಬಾಳ ಸಂಗಾತಿಯ ಭಾವಲಹರಿಯನ್ನು ಕುರಿತು ಪದ್ಯ ಬರೆವಂತೆ ಕೋರಿದುದು.
ಮದುವೆ ನಿಶ್ಚಯವಾದ ಯಾವುದೆ ಕನ್ಯೆಯ ಮನ:ಸ್ಥಿತಿ ಹೀಗಿದ್ದಿರಬಹುದು.