ಕವಿತೆ: ಜೀವನ

              ಜೀವನ

ಸ್ನೇಹ ಪ್ರೀತಿಯ ಸಂಭ್ರಮ, ಶಾಂತಿ, ಪ್ರಗತಿಯ ಸಂಗಮ!

ವಿಸ್ಮಯ ಲೋಕವೆ ಈ ತಾಣ, ಎಲ್ಲಕೆ ಸಾಕ್ಷಿಯು ಈ ಯಾನ
ಬಯಸೋದೊಂದೆ ಈ ಪ್ರಾಣ, ನಿತ್ಯ ನಿರಂತರ ಈ ಧ್ಯಾನ

ಸ್ನೇಹ ಪ್ರೀತಿಯ ಸಂಭ್ರಮ, ಶಾಂತಿ, ಪ್ರಗತಿಯ ಸಂಗಮ!

ಹುಟ್ಟಿದೆ, ಸಾವಿದೆ, ನಡುವಲಿ ಗುಟ್ಟಿದೆ
ಗುಟ್ಟಿನ ನಡುವಲಿ ಹುಟ್ಟಿದೆ ಸಾವಿದೆ
ಸೇರುತ, ಕಾಣುತ, ಯಾನದ ಸೋಜಿಗ
ಬಾಳುತ, ಸಾಗುತ ಸೃಷ್ಟಿಯ ಮೆಚ್ಚಿರೆ!

ಸ್ನೇಹ ಪ್ರೀತಿಯ ಸಂಭ್ರಮ, ಶಾಂತಿ, ಪ್ರಗತಿಯ ಸಂಗಮ!

ಹಗಲಿದೆ, ಇರುಳಿದೆ ನಡುವಲಿ ದಿನವಿದೆ

ಅನುದಿನ ನಡುವಲಿ ಹಗಲಿದೆ ಇರುಳಿದೆ
ಏಳುತ ಬೀಳುತ ಜೀವದ ಕಾಳಗ
ಅಲೆಯುತ ಈಸುತ ತಾರಣ ನೆಚ್ಚಿರೆ

ಸ್ನೇಹ ಪ್ರೀತಿಯ ಸಂಭ್ರಮ, ಶಾಂತಿ, ಪ್ರಗತಿಯ ಸಂಗಮ!

ನೆನಪಿದೆ, ಕನಸಿದೆ ನಡುವಲಿ ಇಂದಿದೆ
ಇಂದಿನ ನಡುವಲಿ ನೆನಪಿದೆ, ಕನಸಿದೆ
ಹೇಳುತ, ಹಾಡುತ, ಭಾವದ ಕಬ್ಬಿಗ
ನಲಿಯುತ, ನಲಿಸುತ, ಬದುಕಿನ ಹುಚ್ಚಿದೆ

ರಚನೆ: "ಸಂತ" (ಸ.ಗು ಸಂತೋಷ)
ತಾರೀಖು: ೧೨/೦೮/೧೪