ಏಕಾಂಗಿ

ಕನಸು ಕಲ್ಪನೆಯ ಲೋಕದಲ್ಲಿ ವಿಹರಿಸುವ ಓ ಸಂಚಾರಿ

ಹೇಗಾದೆ ಏಕಾಂಗಿ? ಇರಲೇಬೇಕಲ್ಲ ನಿನ್ನ ಆ ಸಹಚಾರಿ

ಎಲ್ಲಿರಲಿ ಎಂತಿರಲಿ ತಾ ಒಡನೆ ಪುಟಿದೆದ್ದು ಕುಣಿಯುವ

ಕುಣಿದು ಕುಪ್ಪಳಿಸಿ ಕುಣಿಸಿ ನಲಿಸುತ ತಣಿಸುವ

ಇಂತಿರಲಿ, ಅಂತಿರಲಿ ತಾ ಅರಳಿ ಕಂಪಡರಿ ಸ್ಫುರಿಸುವ

ಸ್ಫುರಿಸಿ ಕೆಣುಕುತ ಕಾಡಿ ಉನ್ಮಾದ ಉಣಿಸುವ

ನಿನ್ನ ಆ ಸಹಚಾರಿ, ಇರಲು ಹೇಗಾದೆ ನೀ ಏಕಾಂಗಿ

ಹಗಲಿರಲಿ, ಇರುಳಿರಲಿ, ನಿತ್ರಾಣ ಇಲ್ಲದೆಯೆ ಹರಿಯುವ

ಹರಿದು ಬೆಳೆಯುತ ಬಳುಕಿ ಬಳಸುತ ನುಲಿಯುವ

ಮಡಿಲಿನಲಿ, ಮನಸಿನಲಿ ಜೀವಿಸುತ ಭಾವದಲೆ ತೇಲುವ

ತೇಲಿ ಗೆಲವಲಿ ಆಡಿ ಕಲ್ಪನೆಯ ತೆರೆಸುವ

ನಿನ್ನ ಆ ಸಹಚಾರಿ, ಇರಲು ಹೇಗಾದೆ ನೀ ಏಕಾಂಗಿ

ಹುಟ್ಟಿರಲಿ, ಸಾವಿರಲಿ , ಸಮಚಿತ್ತ ತೋರುತ ಸಾಗುವ

ಸಾಗಿ ಸಲಹುತ ಮಿನುಗಿ ಬೆಳಗುತ ಬಾಳುವ

ಬದುಕಿನಲಿ, ಬೆದಕಿನಲಿ ಭಾವಿಸುತ ಜೀವಪಥ ಮೆರೆಸುವ

ಮೆರೆಸಿ ಸುಖಿಸುತ ಹಾಡಿ ಕನಸುಗಳ ಸೃಜಿಸುವ

ನಿನ್ನ ಆ ಸಹಚಾರಿ, ಇರಲು ಹೇಗಾದೆ ನೀ ಏಕಾಂಗಿ