ಕವಿತೆ: ಹೋಳಿ

 ಹೋಳಿ

ಪ್ರಕೃತಿಯ ಮಡಿಲಿನಲಿ ವಸಂತ ಬರುವ ಮುನ್ನ

ಫಾಲ್ಗುಣದ ಹುಣ್ಣಿಮೆಯ ಚಂದಿರನು ನಗುವ ದಿನ

ಭೂರಮೆಯ ಸಿಂಗರಿಸಿ, ಹಸಿರುಡುಗೆ ಸಿರಿಕೊಟ್ಟು

ಬಾಂದಳದಿ ತಿಂಗಳಿನ ಚಂದ್ರಿಕೆಯ ಚೆಲುವಿಟ್ಟು

ಕೆಡುಕನ್ನು ಸದೆಬಡಿದು ಒಳಿತನ್ನು ಕಾಪಿಡುವ

ಮೂಜಗವು ಮೆಚ್ಚಿರುವ, ಒಪ್ಪಿರುವ ಹಬ್ಬವಿದೆ

ಶ್ರೀಕೃಷ್ಣ ರಾಧೆಯರ ಜೊತೆಯಾಟ ನೆನಪಿಸುತ

ಪ್ರೀತಿಯ ಸುಮವರಳಿ ಘಮಘಮಿಸಿ ಮೋಹಿಸುತ

ಚೆಲ್ಲಾಟ, ಕೋಲಾಟ, ಕುಣಿಕುಣಿಸಿ ಮನತಣಿಪ

ಸಂಭ್ರಮದ, ಸಡಗರದ ಹೋಳಿಯ ಹಬ್ಬವಿದೆ!!

ಮನೆಮನೆಯ ಅಂಗಳದಿ ಕೊಡಪಾನ ತುಂಬಿಸುವ

ಬಣ್ಣಬಣದ ನೀರನ್ನು ಪಿಚಕಾರಿ ಚಿಮ್ಮಿಸುವ

ಮೈಮನವ ರಂಗಿನಲಿ ದಿನವೆಲ್ಲ ತೋಯಿಸುವ

ಸಂಭ್ರಮದ, ಸಡಗರದ ಕಾಮನ ಹಬ್ಬವಿದೆ!

ರಚನೆ: "ಸಂತ" (ಸ.ಗು ಸಂತೋಷ್)

ತಾರೀಖು: ೧೦/೦೮/೨೦೨೩

ಪ್ರೇರಣೆ: ನನ್ನ ಮಗಳು ಸೃಷ್ಟಿಯ ಶಾಲೆಯಲ್ಲಿ ವಾಚಿಸಲು ಬರೆದ ಕವನ.