ಕವಿತೆ: ವರ್ಷದ ಹರ್ಷ

                 ವರ್ಷದ ಹರ್ಷ

ಪುಟ್ಟ, ಪುಟ್ಟ ಹೆಜ್ಜೆ  ಇಡುತಿಹ ಎನಗೆ ಒಂದು ವರ್ಷ
ಹಿಗ್ಗಿ ಹಿಗ್ಗಿ ನಲಿದು ನಗುತಿರೆ ನೀವು ಏನೊ ಹರುಷ

ವಿಸ್ಮಯದ ಜಗ ಒಳಗೆ, ಅಂತೆಯೆ ಹೊರಗೆ
ಅನುಚಣವು ಬೆರಗಿನಲೆ‌ ಎವೆ ಮುಚ್ಚದೆ
ಕೈಗೆ ಎಟುಕದೆ, ಕಣ್ಗೆ ಕಾಣದೆ ಎಣಿಕೆ ತಪ್ಪಿದೆ
ಬೆಚ್ಚಿ, ಮೆಚ್ಚಿ ಹೊಸತು ಎಲ್ಲ ಸೊಗಸನೊಪ್ಪಿದೆ!

ಸುಸ್ಮಿತರೆ ಜಗ ತುಂಬ, ನನ್ನದೇ ಬಿಂಬ
ಅನುಗಾಲ ಸಂತಸದೆ ನಗು ನಟ್ಟಿದೆ
ಮುದವ ಕಾಣುತೆ, ಮನವ ಕುಣಿಸುತೆ ತಾಳ ಸಿಕ್ಕಿದೆ!
ನಲಿಸಿ ತಣಿಸಿ ಸುಖವೆ ಎಲ್ಲ ಹಿರಿಮೆ ಹೆಚ್ಚಿದೆ

ತನ್ಮಯತೆ ಜಗದಲ್ಲಿ, ಕೌತುಕವೆ ಎಲ್ಲ

ಅಪ್ಪಿ ಮುದ್ದಾಡುವರು ಹಿತವೆನಿಸಿದೆ
ಕನಸು ಸುಮಧುರ, ಬದುಕು ಸುಂದರ, ಶ್ರುತಿ ಸೇರಿದೆ
ಮುದ್ದು ಪ್ರೀತಿ ಸವಿಯಿದೆಲ್ಲ! ಸಗ್ಗ ತೋರಿದೆ!

ರಚನೆ: "ಸಂತ" (ಸ.ಗು ಸಂತೋಷ)
ತಾರೀಖು - ೨೦/೦೫/೨೦೧೭