ಕವಿತೆ: ಬದುಕು

                     ಬದುಕು

ಬದುಕು ಮುಗಿಯದ ಪಾಠ, ದೇವನಾಡಿಸುವಾಟ
ಇರುಳು-ಬೆಳಕಿನ ಮಾಟ, ಜೀವ ಕೂಟ!
ಮನದ ತುಂಬೆಲ್ಲೆಡೆಯು, ನವರಸವು ಚಿಮ್ಮಿರಲು
ಬಳಿಗೆ ಸೆಳೆಯುತ್ತಲಿದೆ ಬಾಳ ಹೂಟ!

ಚೆಲುವು ತುಂಬಿದ ನಾಡು, ಬಯಲಾದ ಕಾಡು
ಖಗಮಿಗಗಳ ಪಾಡು?! ಹರಿಯೆ ನಯನ!
ಹರಿವ ನೀರಿನ ಸೊಬಗು, ’ಬರ’ದ ನೋವಿನ ಕೊರಗು
ನಾಡು ಸೇರಿದ ಕಡಲು, ಅರಿಯೆ ವರುಣ!

ಮೈತ್ರಿ, ಪ್ರೀತಿಯ ಸೊಗಸು, ದ್ವೇಷ ಕಾಮದ ಬಿರುಸು
ಬಿತ್ತ, ಹೊತ್ತ, ಕಿತ್ತ, ಮನದ ಸದನ!
ಸರಳ ಸಂಯಮ ಬದುಕು, ಮರುಳ ಮುನಿಯನ ದುಡುಕು
ವಿತ್ತವ್ಯೂಹದ ಸುತ್ತ, ಕುಣಿವ ಕದನ!

ತುಂಬಿ ತುಳುಕಿದ ತೇಗು, ಅನ್ನ ಮಾಡಿಗೆ ಬಾಗು
ನಭವನೇರಿದ ಕೂಗು, ಹೊತ್ತ ಕರ್ಣ!
ಇರಲರಿವೆಯ ಹರಿವ, ಹರಿದರಿವೆಯ ಹೊಲಿವ
ಬೆತ್ತಲೊಡಲಿನ ನೋಟ, ಬಾಳ ವರ್ಣ!

ಬಣ್ಣ ಬಣ್ಣದ ಕನಸು, ತುಂಬಿ ಕಾಣದ ಸೊಗಸು
ಜಿಗಿದು ಜಾರುತ್ತಲಿದೆ ಮೆಲ್ಲ ಹರಣ!
ಸೃಷ್ಟಿ ನೀಡಿದ ವರವು, ತೃಪ್ತಿ ಕಾಣದ ಮನವು
ಧನದೆ ಹಮ್ಮುಕ್ಕುತಿರೆ ಇಲ್ಲೆ ಮಸಣ!

ಮನುಜ ಸೃಷ್ಟಿಯ ತಂತ್ರ, ಜೀವಜಾತ್ರೆಯ ಯಂತ್ರ
ಭಾವಭವಭೇದಗಳು, ಇಲ್ಲಿ ಸಹಜ!
ಜನನ-ಮರಣದ ತೀರ, ಏಳು-ಬೀಳಿನ ಪೂರ
ನಡೆಸುವಾತನ ನಂಬಿ, ಸಾಗು ಅನುಜ!

                                 ರಚನೆ: ’ಸಂತ’
                                 ತಾರೀಖು: ೦೯/೦೮/೦೫

ಹೂಟ - ಏರ್ಪಾಟು