ಕವಿತೆ: ಎಲ್ಲಿ ಹೋದಳೊ!

                    ಎಲ್ಲಿ ಹೋದಳೊ!!

ನೆನ್ನೆವರಗೆ ಬರೆಯುತಲಿದ್ದು, ನನ್ನ ಮನವ ತಣಿಸುತಲಿದ್ದು,
ಚೆಲುವಿನರಸಿ ಕನಸ ಹೆಣೆದು, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ನನ್ನ-ತನ್ನ ನೆನಪನು ತಂದು, ಚಿಮ್ಮಿಹೊಮ್ಮಿ ಭಾವದ ಬಿಂದು,
ಅರಳೆ ಒಲವ ಅರಳಿಸಿ ತುಂಬಿ, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ಎಂಟರಲಿ ನಂಟನು ಬೆಸೆದು, ನವದಲಿ ನವರಸವೆಸೆದು,
ಹತ್ತು ಹತ್ತಿ ಹತ್ತಿರ ಸರಿದು, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ಮುತ್ತು ಮಾತ ಮತ್ತಲಿ ಮುತ್ತಿ, ಸುತ್ತ ಸುತ್ತಿ ಮನಸ ಸುತ್ತಿ
ಬೆಡಗಿ ಬಯಕೆ ಚಿತ್ತದಿ ಬಿತ್ತಿ, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ಆಟಪಾಟಕೂಟವ ನಡೆಸಿ, ಹೂ-ದುಂಬಿ ಪಾಟವ ಕಲಿಸಿ,
ನೇಹ ಮಧು ನೀಡಿದ ಸರಸಿ, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ಶ್ರಾವಣದಾಗೆ ಮತ್ತೆ ಕಲೆತು, ನಾಲ್ಕೂ ಕಾಲ ಮಾತಲೆ ಬೆರೆತು,
ಮತ್ತೆ ಮೌನ ತಂದು ಈಕೆ, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ನಾಕು-ಎಂಟು ನಾನು ಬರೆದೆ, ಎಂಟು-ಹತ್ತ ಹೊನ್ನೆನಪ ಎರೆದೆ,
ಅತ್ತ ಚಿತ್ತ ಬಾರದೆ ಇತ್ತ, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ನೆನ್ನೆವರಗೆ ಬರೆಯುತಲಿದ್ದು, ನನ್ನ ಮನವ ತಣಿಸುತಲಿದ್ದು,
ಚೆಲುವಿನರಸಿ ಕನಸ ಹೆಣೆದು, ಎಲ್ಲಿ ಹೋದಳೊ ಗೆಳೆಯ ಎಲ್ಲಿ ಹೋದಳೊ!

ರಚನೆ - ಸ.ಗು.ಸಂತೋಷ್
ತಾರೀಖು - ೧೪/೦೨/೦೫