ಕವಿತೆ: ಹೋಹೆನ್‌ಜ಼ೋಲೆರ್ನ್

 "ಹೋಹೆನ್‌ಜ಼ೋಲೆರ್ನ್"

ವಸುಂಧರೆಗೆ ತೊಡಿಸಿರಲು ತುಹಿನಾಂಬರದ ಸಿಂಗಾರ 

ಕಂಗೊಳಿಸಿದೆ ನಡುವಿನಲಿ ಭವ್ಯ ಭವನದ ಚಿತ್ತಾರ

ಪ್ರಕೃತಿಯ ವಿಸ್ಮಯದ ಆವರಣವ ಸೆರೆಹಿಡದು

ಮೂಡಿಸಿಹ ಅಚ್ಚರಿಯ ಅಚ್ಚುಕಟ್ಟಿನ ಈ ಅಚ್ಚು

ನೋಡಿದೊಡನೆಯೆ ಬೆರಗು! ಮರುಕ್ಷಣವೆ ಅಚ್ಚುಮೆಚ್ಚು! 

ಹೊತ್ತುರಳಿಯೂ ಬಿಡದು, ನೋಡಬೇಕೆನುವ ಹುಚ್ಚು!!

ಎಲ್ಲರೊಳು ಕವಿ ಉದಯ, ಎಲ್ಲರಿಗಿದು ಕವಿಸಮಯ 

ಕಲ್ಪನೆಯ ಕಣ್ತೆರೆಯೆ, ಮುಂದೆ ಆ ದಿವ್ಯಲೋಕ

ಪಾಲ್ಗಡಲ ಮೇಲಿರುವ ಶ್ರೀಹರಿಯ ವೈಕುಂಠ!

ಹಿಮಮಲೆಯ ನಡುವಿರುವ ಗೌರೀಶ ಕೈಲಾಸ!

ಎಲ್ಲೆಡೆಯು ಮಂಜುಮಣಿ,ಅಲ್ಲಲ್ಲಿ ಹಿಮಪಾತ

ತನುಮನವನಾವರಿಸಿ ಧವಳಗಿರಿ, ವಿಮಲಸಿರಿ

ನಿರ್ಮಲತೆ ಮಡುಗಟ್ಟಿ, ತೋರುತ ನಿತ್ಯತೆಯ ಅವತಾರ

ನಿಸ್ಪೃಹತೆ ಮೈಗೂಡಿ, ದಿಕ್ತಟ ಗುಂಜಿಸಿದೆ ಓಂಕಾರ!

ರಚನೆ: "ಸಂತ" (ಸ.ಗು ಸಂತೋಷ್ಟ)

ತಾರೀಖು: ೧೬/೧೧/೨೦೨೪

ಪ್ರೇರಣೆ: ನನ್ನ ಆತ್ಮೀಯ ಗುರು (ಗುರುದತ್) ಅದ್ಭುತವಾಗಿ ತನ್ನ ಕ್ಯಾಮೆರಾದಲ್ಲಿ ಸೆರೆಹಿಡಿದು, ಹಂಚಿಕೊಂಡ ಛಾಯಾಚಿತ್ರದಲ್ಲಿನ ನಿಸರ್ಗ ಸೌಂದರ್ಯ!ಅ